МУҲАММАД – ЧАРО ВА
БО КАДОМ МАҚСАД ИН НОМРО ЗИЁД
ИСТИФОДА МЕБАРАНД?
Вазира, модари панҷ фарзанд
буда, ҳоло 39 сол дорад, дар шаҳри Гулистони вилояти Суғд ба сар
мебарад. Вай 4 писар ва 1 духтар дорад. Оилаи Вазира ба номгузории фарзандон бисёр
аҳамияти ҷиддӣ медиҳанд. Номҳои фарзандони Вазира – Манижа, Муҳаммад, Додихудо,
Алишер ва Амрихудо мебошад. Духтари ягонаи хонаводаро волидон бештар Хадича ном
мебаранд.
Вақте писари аввалинаш ба дунё омад, шавҳари Вазира пешниҳод кард, ки ба
кӯдаки навтавлидёфта номи Муҳаммадро медиҳанд. Чунки ӯ орзу дошт, ки яке аз
номҳои фарзандаш номи Пайғамбар (с) номгузорӣ шуда бошад.
Муҳаммади 15-сола, писари калонии Вазира ҳоло дар синфи 8-уми мактаби миёнати №15-и шаҳри Гулистон мехонад. Ӯ оромтабиат буда, маҳорати хуби расмкашӣ дорад.
- Ҳамеша дар маҷлисҳои синфӣ аз роҳбари синфаш ва муаллимони мактаб миннатдорӣ мешунавам. Аълохони мактаб ба ҳисоб меравад, варзишро хеле дӯст медорад. Чандин маротиба дар мусобиқаҳои шаҳриву вилоятӣ, аз намуди варзиши гӯштини юнонию римӣ соҳиби ҷойҳои сазовор гардидааст, - мегӯяд Вазира.
Бино ба гуфтаи муаллимаи яке аз мактабҳои шаҳри Хуҷанд, ки дар синфаш ҳамагӣ 39 хонанда таҳсил мекунад ва аз он 19 нафараш писарбачаанд, номи се талабаи ӯ решаи «Муҳаммад»-ро дорад. «Ба монанди Муҳаммадҷон, Муҳаммадиқбол, Муҳаммадюсуф».
Аслан, номи Муҳаммад арабӣ буда, маънояш сутудашуда, ҳамдшуда, номи паёмбар (с) мебошад.
Дар Тоҷикистон бо Қарори Ҳукумати Ҷумҳурии Тоҷикистон аз 27 июли соли 2016,
№325 ФЕҲРИСТИ НОМҲОИ МИЛЛИИ ТОҶИКӢ тасдиқ шудааст, ки онро дар сомонаи
САҲШ пайдо кардан мумкин аст. Дар қарор омадааст, ки ҳадаф аз таҳияи «Феҳристи
номҳои миллии тоҷикӣ» эҳёи арзишҳои маънавӣ ва сарватҳои бебаҳои таъриху
фарҳанги миллӣ тавассути забони миллӣ, инчунин номгузории суннатии тоҷикӣ
мебошад.
Инчунин, феҳристи мазкурро дар сомонаи Кумитаи забон ва истилоҳоти Ҳукумати
Ҷумҳурии Тоҷикистон низ пайдо кардан мумкин аст.
Феҳристи номҳои миллии тоҷикӣ аз ду қисмат иборат буда, бо рақамгузорӣ ҷудо карда шудааст. Дар қисмати аввал, номҳои духтарона ва дар қисмати дуввум номҳои писарона оварда шудаанд. Бо мақсади навиштани дурусти номҳои миллӣ дар ҳуҷҷатгузорӣ тарзи навишти номҳои духтаронаю писарона бо се забон – тоҷикӣ, русӣ ва англисӣ дода шудаанд.
Дар қарор, дар бораи номҳои Пайғамбар (с) қисмат омадааст, ки бояд номҳо дар шакли пурра (дуруст) навишта шаванд. Номҳое, ки аз номи пайғамбар ташаккул ёфта, дар тӯли таърих ихтисор шуда, дар шакли «ма, мат, мад, мамад, маҳмад» корбурд мешуданд, ба феҳрист дар шакли пурраашон ворид гардиданд: Мадкарим – Муҳаммадкарим, Нормат – Нормуҳаммад, Маниёз – Муҳаммадниёз, Шоҳмат – Шоҳмуҳаммад, Маҳмадҷон – Муҳаммадҷон.
Агар дар феҳрист ҳамагӣ зиёда аз 3300 номи тоҷикии миллӣ пешниҳод шуда
бошад, мо аз феҳрист бо решаи Муҳаммад 89 номи гуногунро пайдо намудем. Аз ҷумла,
Абумуҳаммад, Валимуҳаммад, Муҳаммаддовуд, Муҳаммадраҷаб, Муҳаммадшафеъ,
Саидмуҳаммад, Файзимуҳаммад ва ғайра.
Масъулони САҲШ-и вилояти Суғд мегӯянд, ки барои фарзандон истифода бурдани
номҳои Пайғамбарон монеагӣ надорад, вале номи Муҳаммадро волидайне, ки ба
кӯдаконашон гузоштан мехоҳанд, меафзоянд. «Ҳоло шумораи аниқи номҳое, ки бо
решаи «Муҳаммад» гузошта шудаанд, гуфтан мушкил аст ва бояд барои ин кор ба
Агентии омори муроҷиат намуд».
Рустам Азизӣ, диншинос дар бораи ҳадисе, ки гӯиё яке аз номи фарзандонро бояд бо номи Пайғамбар (с) гузоштан лозим аст, мегӯяд, ин гап асоси воқеӣ надорад. Ин ҳадисро ҳадиси мавзӯъ мегӯянд, яъне ҳадиси сохта ва дурӯғ аст.
- Ба кӯдак гузоштани номи Пайғамбар (с) хуб аст, лекин ҳатмӣ нест. Ҳадисе, ки «ҳар касе се фарзанд дошту якеашро ба номи ман нагузошт, нисбат ба ман беэҳтиромӣ аст», ин ҳадиси дурӯғ аст, яъне сохта. Аз нуқтаи назари дини мубини Ислом асос надорад, - афзуд Рустам Азизӣ.
Муҳаммад, фарзанди калонии Вазира дар оянда орзуи зиёд дорад. Ӯ мехоҳад меъмори машҳур шавад ва нақшаи калонтаринаш киштиеро кашида бошад. Орзуи дигараш нақши хонаи орзудоштаи модарашро тасвир ва бунёд намояд.
Гузал МАҲКАМОВА, рӯзноманигор
Комментарии
Отправить комментарий